Leonard Kurti, specialist i Biokimisë Klinike dhe drejtor i Klinikës së Biokimisë në Qendrën Klinike Universitare të Kosovës (QKUK), ka ndërruar jetë.
Oda e Farmacistëve të Kosovës ka bërë të ditur këtë lajm dhe ka shprehur ngushëllime për familjarët, të afërmit dhe kolegët e tij, duke vlerësuar kontributin e tij në profesion dhe bashkëpunimin me sektorin farmaceutik.
Në njoftimin e saj, Oda e Farmacistëve të Kosovës thekson se ndarja nga jeta e Kurtit është një humbje e madhe për të gjithë ata që e njohën. “Ndarja e tij nga jeta përbën një humbje të rëndë për familjen, kolegët dhe komunitetin shëndetësor, të cilit i shërbeu me përkushtim, profesionalizëm dhe dinjitet”, thuhet në njoftim.
Oda gjithashtu ka shprehur mirënjohje për kontributin e Kurtit në bashkëpunimin institucional dhe mbështetje ndaj sektorit farmaceutik. “Gatishmëria e tij për të ndihmuar, korrektësia dhe mikpritja e treguar ndaj anëtarëve të Odës do të kujtohen gjithmonë me respekt të veçantë”, thuhet më tej në reagim.
