Nga viti i ardhshëm, do të fillojë zbatimi i një modeli të ri, modern dhe digjital për pagesën e tarifës rrugore.
Ky sistem, i njohur si “Free-Flow”, do t’u lejojë automjeteve të kalojnë pa u ndalur në pikat e pagesës, duke u identifikuar përmes kamerave dhe pajisjeve elektronike TAG.
Drejtori i Ndërmarrjes Publike “Rrugët Shtetërore”, Koce Trajanovski, në një intervistë për TVM2, theksoi se kompania e tij është duke punuar intensivisht për të implementuar standardet moderne digjitale evropiane në sistemin e pagesës së tarifës rrugore.
Në fazën fillestare, sistemi pritet të zbatohet si projekt pilot për automjetet e rënda, kryesisht kamionët.
Për këtë qëllim, NP “Rrugët Shtetërore” planifikon të vendosë kamera të specializuara përgjatë rrugëve, të ngjashme me sistemin “Qyteti i Sigurt”.
Këto kamera do të identifikojnë automjetet dhe do të regjistrojnë kalimin e tyre, mbi bazën e të cilit do të llogaritet tarifa rrugore, pa nevojën që drejtuesit të ndalen fizikisht në pikat e pagesës. “Fillimisht ky sistem do të jetë i dedikuar për kamionët dhe jo për automjetet e lehta, pasi kështu do të parandalohet shmangia e pagesës së tarifës rrugore.
Një shembull tipik është pika e pagesës në Petrovec.
Para kësaj pike, në afërsi të Idrizovës, shumë automjete dalin nga autostrada dhe vazhdojnë nëpër rrugën rajonale, përmes Petrovecit dhe Rzhaniçinos, deri në Katllanovë, ku sërish kyçen në rrugë.
Kështu, ato e shmangin pagesën e tarifës rrugore, dëmtojnë rrugën e cila nuk është e paraparë për automjete të rënda dhe kamionë, dhe rrezikojnë sigurinë e banorëve të asaj zone.
Me këtë projekt synojmë të parandalojmë këto dukuri dhe t’i detyrojmë transportuesit të paguajnë tarifën rrugore.
Po ashtu, në Milladinov, ku aktualisht nuk ka sistem TAG, do të shohim mundësinë e vendosjes së sistemit “Free-Flow”,” deklaroi Trajanovski.
Modeli i ri i pagesës së tarifës rrugore, përmes regjistrimit të pajisjeve TAG dhe identifikimit të targave nga kamerat, fillimisht do të zbatohet në rrugët e reja shtetërore që do të lëshohen në përdorim.
Në një fazë të mëvonshme, pritet që sistemi të shtrihet edhe në Korridorin 10 dhe drejt Tetovës.
Megjithatë, ende nuk dihet nëse ky ndryshim do t’u kushtojë më shumë apo më pak qytetarëve. “Po, këtë do ta shohim në vijim.
E rëndësishme është që të mos ketë pagesë të tarifës rrugore si deri më tani.
Fillimisht ky sistem i ri planifikohet të zbatohet në rrugët e reja që po ndërtojmë, ku aktualisht nuk ka pagesë të tarifës rrugore.
Më pas, në fazën e ardhshme, do të përfshihet edhe Korridori 10, ku aktualisht paguhet tarifa rrugore, si dhe drejt Tetovës.
Por, kur do të ndodhë kjo, pas një ose dy vitesh, nuk mund t’ju them.
Për momentin, nuk mund të flasim nëse sistemi do të jetë më i lirë apo më i shtrenjtë,” theksoi drejtori i NP “Rrugët Shtetërore”, Koce Trajanovski.
Një model i tillë i pagesës së tarifës rrugore tashmë po testohet pjesërisht në Serbi, ndërsa Kroacia ka avancuar më shumë me zbatimin e tij.
