Dogana e Kosovës ka bërë një zbulim të rëndësishëm gjatë kontrollit të një automjeti VW Caddy me targa të huaja, ku u gjet një sasi e konsiderueshme armësh.
Sipas njoftimit të Doganës, ky zbulim është arritur falë përdorimit të pajisjeve skanuese, të cilat identifikuan një ngarkesë të fshehur me armë dhe municion.
Gjatë kontrollit u gjetën gjithsej 42 pushkë automatike të tipit AK-47 (Kallashnikov), një pushkë e tipit Walther me kalibër 12 mm, si dhe 41 karikatorë për armët AK-47.
Pas identifikimit të ngarkesës, rasti është trajtuar në bashkëpunim me Policinë e Kosovës dhe institucionet përkatëse të drejtësisë, në përputhje me procedurat ligjore.
Dogana e Kosovës ka vlerësuar se ky zbulim është rezultat i profesionalizmit të zyrtarëve doganorë dhe përdorimit të teknologjisë moderne në kontroll dhe detektim.
Institucioni gjithashtu shpreh mirënjohje për mbështetjen e vazhdueshme nga Shtetet e Bashkuara të Amerikës dhe Ambasada Amerikane në Kosovë, duke theksuar se kjo ka kontribuar në fuqizimin e kapaciteteve teknologjike dhe operative, përfshirë pajisjet skanuese që ndihmuan në zbulimin e armëve.
Dogana e Kosovës vazhdon të theksojë angazhimin e saj për të luftuar kontrabandën, trafikimin e armëve dhe narkotikëve, si dhe aktivitete të tjera të kundërligjshme.
