Ish-presidenti Ilir Meta ka bërë disa deklarata të forta gjatë seancës së sotme në Gjykatën e Posaçme, ku po gjykohet për çështjen që e përfshin.
Meta ka mohuar përfshirjen e tij në financat e Partisë së Lirisë (ish-LSI), duke theksuar se përgjegjësia për këto çështje i takon sekretarisë ose kryesisë së partisë.
Ai gjithashtu është ndalur te çështja e lobimit, duke shpjeguar se rastin e vetëm kur ai ka ndërhyrë politikisht, por jo financiarisht, ka qenë pagesa prej 15 mijë dollarësh, e cila sipas tij është bërë në mënyrë të ligjshme dhe me vendim të kryesisë.
Gjatë fjalës së tij, Meta përmendi edhe ish-ambasadoren amerikane Yuri Kim, me tone të ashpra, duke e quajtur atë “armike të përbetuar të Shqipërisë në shërbim të Serbisë”.
Ai hodhi akuza për ndërhyrje nga përfaqësues të ambasadave të huaja në procesin e emërimit të anëtarëve të Gjykatës Kushtetuese.
Meta pretendoi se, gjatë kohës që ishte President i Republikës, ishte kërcënuar nga pesë përfaqësues ambasadash për të mos emëruar Marsida Xhaferllarin, por Arta Vorpsin. “A e di ajo gjykatë se jam kërcënuar si President i Republikës nga 5 fëlliqësira ambasadash, që përfaqësonin 5 ambasada të huaja, që të mos ishte Marsida Xhaferllari në Kushtetuese, por të ishte ajo e Lanës, Arta Vorpsi?”, tha Meta.
Ai gjithashtu theksoi se nuk përjashton mundësinë që, përmes manipulimeve, të ngrihen akuza absurde, duke përmendur deri në një komplot për vrasjen e presidentit amerikan John F.
Kennedy.
Deklarata e plotë e Ilir Metës në GJKKO: “Nuk habitem të ngrenë akuzë edhe për komplot për vrasjen e Kennedy-t me këto manipulime që janë bërë.
Marrëveshja ka qenë mes dy subjekteve GSIS-Unifi.
Kryetari i LSI-së vepron sipas ligjeve.
Kryetari nuk ka pasur të bëjë me financat, i ka sekretaria ose kryesia e partisë.
Aq më tepër për lobimet, asnjë shpenzim.
Nëse ka një njeri që e di më mirë këtë, është zoti Kllapi.
Ngushëllime për humbjen e nënës, se e mora vesh nga mediat.
Kllapi e di mirë, jemi takuar para se të arrestohesha.
I vetmi rast i dokumentuar që kam ndërhyrë politikisht, jo financiarisht, është pagesa e ligjshme prej 15 mijë dollarësh si parapagim.
Kjo është bërë me vendim kryesie.
Nuk po i futem përrallave të tjera.
Kanë qenë të diktuara nga Yuri Kim, armike e përbetuar e Shqipërisë në shërbim të Serbisë.
Nëse prokurori ka të drejtë të njoftojë që kam bërë pagesa, nuk i kam bërë, sepse nuk kam marrëdhënie me Shatkun, as me askënd.
Zonja ka të drejtën të mbrohet.
Do të mbajë ajo përgjegjësi.
Nuk e di cilës gjykatë i është referuar SPAK-u që prej dy vitesh të bllokoheshin informacionet nga GSIS për LSI-në.
A e di ajo gjykatë se jam kërcënuar si President i Republikës nga pesë përfaqësues ambasadash të huaja, që të mos ishte Marsida Xhaferllari në Kushtetuese, por të ishte ajo e Lanës, Arta Vorpsi?
Ajo gjykatë nuk e di që unë iki që sot me shpenzimet e mia në SHBA, nëse ata kanë gjë me mua.
Në SHBA edhe Maduron e arrestuan me mandat arresti.
Ka të bëjë seriozisht me marrëdhëniet shqiptare amerikane. Çdo veprim e kam bërë përmes zonjës.
Kontrata është aq e specifikuar, çdo gjë e verifikueshme.
Pretendimi i prokurorisë që qenka blerë shtëpi, qenka një mesazh 28 qershor 2009 se unë gjëja paskam mesazh me zotin Ismaili me 22 qershor, por oficeri i policisë gjyqësore e ka bërë me 28 qershor procesverbalin. “Takohemi nesër se më duhen 200 mijë patjetër”.
Nuk ekziston një mesazh i tillë.
Pse e ka bërë p.v me 28 në darkë, sepse me 29 qershor ishin zgjedhjet dhe mendonte se do fitonte partia e tij.
DIA është regjistruar pas 14 muajsh në Shqipëri.
Prokuroria është fiksuar te 200 mijëshi.
I kërkoj prokurorisë t’i drejtohet DIA-s të Washingtonit, bëni një letër porosi.
