Kryetari i Kuvendit të Shqipërisë, Niko Peleshi, ka bërë një reagim publik lidhur me protestat që po zhvillohen prej gjashtë ditësh në Tiranë dhe qytete të tjera, duke dënuar aktet e dhunës, sulmet ndaj institucioneve, si dhe dëmtimin e pronës publike dhe private.
Në një deklaratë publike, ku ndau edhe qëndrimin zyrtar të Komisionit Evropian, kryeparlamentari theksoi se aspiratat e të rinjve janë të legjitime, por mjetet e përdorura në rrugë duhet të mbeten paqësore.
Peleshi u shpreh se “të rinjtë janë e sotmja dhe e nesërmja e Shqipërisë.
Ata kanë të drejtë të kërkojnë me zë të lartë më shumë të drejta, më shumë mundësi.
Kanë të drejtë të ëndërrojnë një të ardhme të barabartë me moshatarët e BE-së”, duke shtuar se “sulmet ndaj institucioneve, djegia dhe shkatërrimi i pronës nuk kanë të bëjnë as me studentët, as me të drejtën e tyre për të protestuar”.
Në vijim të mesazhit të tij, Kryetari i Kuvendit theksoi se rruga e vetme për adresimin e pakënaqësive shoqërore është komunikimi institucional dhe mirëkuptimi mes palëve, duke i bërë thirrje aktorëve politikë dhe qytetarëve për vetëpërmbajtje. “Le të ulemi me njëri-tjetrin.
Pa paragjykim, pa mllef. Çdo orë që kalon e bën më të vështirë dialogun.
Mbase mund të mos bihet dakord, por duhet folur.
Duhet dëgjuar”, deklaroi Peleshi.
Në përmbyllje të apelit të tij, kryeparlamentari kërkoi kapërcimin e tensioneve në interes të vendit, duke përfunduar me fjalët: “T’i japim dorën njëri-tjetrit sot!
Jemi për një qëllim.
Për Shqipërinë”.
