Ministri i Drejtësisë, Jeton Shasivari, kishte sot një takim me ambasadorin e Bashkimit Evropian, Michalis Rokas, ku diskutuan për ecurinë e reformave në drejtësi dhe prioritetet në procesin e integrimit evropian.
Gjatë këtij takimi, ambasadori Rokas i paraqiti Raportin e Progresit të Komisionit Evropian për vitin 2026, duke theksuar vlerësimet dhe rekomandimet për fushën e drejtësisë. “Me kënaqësi konstatuam se përpjekjet dhe puna jonë në zbatimin e reformave kanë dhënë rezultate, të cilat janë reflektuar edhe në përmirësimin e vlerësimeve të Komisionit Evropian krahasuar me raportin e vitit të kaluar.” “Këto vlerësime pozitive janë një konfirmim i punës së deritanishme, por njëkohësisht edhe një motivim dhe përgjegjësi shtesë për të vazhduar me të njëjtin përkushtim në forcimin e sundimit të ligjit, garantimin e pavarësisë së gjyqësorit dhe ndërtimin e institucioneve më efikase dhe më të përgjegjshme.” “Shpreha mirënjohjen time për mbështetjen e vazhdueshme të Bashkimit Evropian dhe riafirmova përkushtimin tonë për përmbushjen e rekomandimeve të Komisionit Evropian dhe obligimeve që burojnë nga Agjenda Reformuese.
Vazhdojmë me reforma konkrete, rezultate të qëndrueshme dhe një vizion të qartë: drejtësi më efikase, institucione më të forta dhe një të ardhme evropiane për qytetarët tanë,” ka shkruar Shasivari.
