Darsej Rizaj, bashkëthemelues i “Shkollës Digjitale” dhe “StarLabs”, ka kërkuar që çështja e sigurisë kibernetike të diskutohet në seancën e sotme të Kuvendit të Kosovës.
Përmes një reagimi publik, Rizaj u ka bërë thirrje deputetëve që të shqyrtojnë përgatitjen e institucioneve të Kosovës për t’u përballur me sulme të mundshme kibernetike, duke e ilustruar këtë me disa raste të fundit të raportuara në Evropë.
Ai përmendi sulmet ndaj sistemeve të frigoriferëve në Francë më 11 dhe 12 tetor, si dhe raste të ngjashme më 1 dhe 2 nëntor në Suedi, Belgjikë, Luksemburg dhe Estoni, të cilat, sipas tij, kanë shkaktuar dëme të konsiderueshme në sektorin ushqimor.
Rizaj gjithashtu theksoi sulmet ndaj sistemeve të ftohjes në tri qendra të ruajtjes së plazmës në Francë.
Duke iu referuar një hulumtimi të publikuar nga OpenAI më 4 nëntor, ai theksoi rëndësinë e përdorimit të inteligjencës artificiale për identifikimin dhe mbylljen e dobësive në sistemet e sigurisë.
Në reagimin e tij, Rizaj ngriti pyetjen se sa e përgatitur është Kosova për raste të tilla dhe kur do të fillojë përdorimi i inteligjencës artificiale për të forcuar sigurinë e infrastrukturës shtetërore.
