Komisioni Parlamentar Antimafia i Italisë tregon për një ndryshim të rëndësishëm në marrëdhëniet mes organizatave kriminale shqiptare dhe mafieve tradicionale italiane.
Grupet shqiptare tani nuk shihen vetëm si furnizues ose bashkëpunëtorë në trafikun e drogës, por po fitojnë një rol më aktiv në marrëveshjet dhe operacionet kriminale të përbashkëta.
Një nga shembujt më të njohur të këtij bashkëpunimi është hetimi Hydra në Lombardi.
Një raport i ri nga Komisioni Parlamentar Antimafia në Itali thekson fuqizimin dhe zgjerimin e rrjeteve kriminale në veri të vendit, duke vënë në pah marrëdhëniet gjithnjë e më të forta ndërmjet grupeve shqiptare dhe organizatave historike mafioze italiane.
Dokumenti, i titulluar “Relazione sulla ’ndrangheta nell’Italia settentrionale.
Geografia del radicamento e nuove modalità operative”, u miratua më 3 nëntor 2026, nën drejtimin e Chiara Colosimo.
Sipas analizës dhe dëshmive të prokurorëve italianë, një nga zhvillimet më të rëndësishme është transformimi i marrëdhënieve mes grupeve kriminale.
Organizatat shqiptare po shfaqen në struktura bashkëpunimi ku marrin pjesë edhe përfaqësues të ’Ndrangheta-s, Cosa Nostra-s dhe Camorra-s.
Hetimi i njohur si “Hydra”, zhvilluar në rajonin e Lombardisë, zbuloi një strukturë bashkëpunimi mes këtyre organizatave dhe grupeve kriminale shqiptare.
Sipas raportimeve nga media italiane, hetimi tregon se në veri të Italisë është krijuar një sistem bashkëpunimi mes organizatave kriminale, të cilat ndajnë interesa në trafikun e drogës, mashtrimet fiskale dhe pastrimin e parave.
Prokurorja Alessandra Cerreti ka përshkruar praninë e grupeve shqiptare si të heshtur, por të vazhdueshme dhe të specializuara, duke e interpretuar këtë si një tregues se grupet shqiptare kanë fituar një rol më të rëndësishëm në marrëdhëniet me organizatat tradicionale mafioze.
Një nga përfundimet kryesore të raportit është se Ndrangheta ka ndryshuar mënyrën e funksionimit në Italinë Veriore.
Në vend të përdorimit të vazhdueshëm të dhunës dhe kontrollit të drejtpërdrejtë territorial, organizata po përdor gjithnjë e më shumë marrëdhëniet ekonomike, bizneset dhe ndërmjetësit financiarë për të zgjeruar ndikimin e saj.
Sipërmarrësit në veri të Italisë nuk janë gjithmonë vetëm viktima të presionit mafioz; në disa raste, ata bëhen klientë ose partnerë të organizatave kriminale, duke kërkuar shërbime të paligjshme për të fituar avantazhe ekonomike.
Raporti e përshkruan këtë model si një mafie që përshtatet me tregun, depërton në ekonominë legale dhe shfrytëzon dobësitë e sistemit financiar.
Një tjetër element i rëndësishëm lidhet me faktin se bashkëpunimi ekonomik mes organizatave kriminale nuk do të thotë që ato kanë hequr dorë nga dhuna.
Prokurorja Cerreti, duke iu referuar hetimit Hydra, thekson se pavarësisht marrëveshjeve dhe interesave të përbashkëta, këto organizata mbeten mafioze dhe mund të përdorin dhunën nëse interesat e tyre cenohen.
Ndërkohë, prokurori kombëtar antimafia Giovanni Melillo ka paralajmëruar se marrëdhënia mes mafies dhe ekonomisë legale ka kaluar përtej konceptit tradicional të infiltrimit, duke folur për një ndërthurje gjithnjë e më të thellë mes strukturave kriminale dhe një pjese të sistemit ekonomik.
Rreziku që paraqesin rrjetet kriminale shqiptare në Itali është evidentuar edhe në operacione të tjera ndërkombëtare.
Në maj të vitit 2026, Eurojust njoftoi për një operacion të përbashkët mes autoriteteve shqiptare dhe italiane kundër një rrjeti të përfshirë në trafik droge, vrasje dhe pastrim parash.
Operacioni çoi në 12 arrestime dhe identifikimin e një skeme pastrimi të afro 1 milion eurove, të transferuara nga Italia drejt Shqipërisë.
Sipas Eurojust, bashkëpunimi mes SPAK-ut dhe autoriteteve italiane ka rezultuar në mbi 170 arrestime gjatë periudhës 2018-2026 dhe sekuestrimin e më shumë se shtatë tonëve lëndë narkotike.
Ky raport i ri i Antimafias italiane tregon se sfida nuk lidhet më vetëm me trafikun e drogës, por edhe me ndërthurjen e organizatave kriminale në biznes, financë dhe ekonomi, ku kufijtë mes mafieve tradicionale italiane dhe rrjeteve ndërkombëtare po bëhen gjithnjë e më të paqarta.
