Natasha Kandiq, themeluesja e Fondit për të Drejtën Humanitare, ka shprehur kritika të forta ndaj praktikave në Serbi që heshtin vendimet gjyqësore dhe faktet e vërtetuara përmes proceseve gjyqësore.
Ajo thekson se këto janë zëvendësuar me një të ashtuquajtur “të vërtetë të popullit”.
Në një reagim ndaj ambasadorit të Bashkimit Evropian në Serbi, Andreas von Beckerath, Kandiq ka theksuar se, përveç paralajmërimit të tij për glorifikimin e kriminelëve të dënuar të luftës, ai duhet të adresojë edhe praktikën e mohimit dhe shtrembërimit të fakteve për krimet e luftës.
Sipas saj, shtrembërimet më të mëdha lidhen me gjenocidin në Srebrenicë dhe viktimat e luftës në Kosovë. “Përballja e përgjegjshme me të kaluarën kërkon ndërprerjen e këtyre praktikave”, ka theksuar Kandiq.
Ajo gjithashtu ka vënë në dukje dokumentacionin e Fondit për të Drejtën Humanitare (HLC), i cili, sipas saj, përmban bazën më gjithëpërfshirëse të të dhënave për humbjet njerëzore në Kosovë, duke dokumentuar fatin individual të viktimave të të gjitha përkatësive etnike.
