Kryeministri Edi Rama ndodhet në Paris për të marrë pjesë në Forumin e Paqes, ku zhvilloi një takim dypalësh me presidentin francez Emmanuel Macron.
Ky forum, i cili këtë vit zhvillohet në një kontekst të rëndësishëm gjeopolitik, teknologjik dhe ambiental, ka në qendër të diskutimeve rëndësinë e qeverisjes efektive për garantimin e paqes së qëndrueshme, stabilitetit dhe prosperitetit.
Gjatë këtij aktiviteti ndërkombëtar, Rama do të marrë pjesë në një sesion të posaçëm, në formatin “Spotlight”, ku do të diskutojë mbi perspektivën evropiane dhe rëndësinë e procesit të anëtarësimit në Bashkimin Evropian për brezat e rinj.
Ky diskutim është veçanërisht i rëndësishëm në kushtet kur Shqipëria po vazhdon negociatat për anëtarësim në BE, dhe integrimi evropian mbetet një nga prioritetet kryesore të politikës së jashtme të vendit.
Përveç këtij sesioni, kryeministri shqiptar do të marrë pjesë gjithashtu në seancën plenare të Forumit të Paqes, me temën “From Sovereignty to Cooperation” (Nga sovraniteti te bashkëpunimi).
Në këtë panel do të shqyrtohen dimensionet e ndryshme të bashkëpunimit ndërkombëtar dhe nevoja për koordinim mes shteteve përballë sfidave që po ndryshojnë marrëdhëniet ndërkombëtare.
Takimi me Macronin është një hap i rëndësishëm në forcimin e marrëdhënieve mes Shqipërisë dhe Francës, përveçse ofron mundësinë për të diskutuar çështje të përbashkëta, veçanërisht ato që lidhen me procesin e integrimit evropian.
Paris zyrtar mbetet një aktor i rëndësishëm në këtë proces, dhe pjesëmarrja e Ramës në forum i ofron Shqipërisë mundësinë për të shprehur qëndrimet e saj për të ardhmen evropiane dhe bashkëpunimin ndërkombëtar.
