Presidentja e Kosovës, Justina Shiroka Pula, ka reaguar pas aktgjykimit të sotëm të Dhomave të Specializuara në Hagë ndaj ish-presidentit Hashim Thaçi dhe të tjerëve, në lidhje me akuzat për pengim të administrimit të drejtësisë.
Përmes një deklarate nga Presidenca, Shiroka Pula ka shprehur shqetësime për respektimin e të drejtave të palëve në këtë proces gjyqësor, duke theksuar se çdo institucion i Republikës së Kosovës, përfshirë edhe Dhomat e Specializuara, duhet të veprojë sipas Kushtetutës dhe standardeve ndërkombëtare për të drejtat e njeriut.
Ajo ka theksuar se proceset gjyqësore duhet të garantojnë respektimin e të drejtave të të akuzuarve dhe zbatimin e procedurave ligjore. “Çdo proces gjyqësor duhet të zhvillohet në përputhje të plotë me standardet ndërkombëtare të gjykimit të drejtë, duke garantuar të drejtat e të akuzuarve dhe respektimin e procedurave ligjore”, thuhet në reagimin e presidentes.
Shiroka Pula ka nënvizuar se Kosova mbetet e përkushtuar ndaj drejtësisë, sundimit të ligjit dhe mbrojtjes së të drejtave dhe lirive themelore të njeriut.
Në këtë kontekst, ajo ka kërkuar që edhe Dhomat e Specializuara të veprojnë në përputhje me këto standarde, duke garantuar, ndër të tjera, respektimin e së drejtës për ankim.
Në përfundim, presidentja ka rikujtuar edhe kontributin e Ushtrisë Çlirimtare të Kosovës në luftën për liri dhe pavarësi, si dhe sakrificën e popullit të Kosovës.
Sipas saj, këto janë pjesë e pandashme e historisë së vendit dhe nuk mund të vihen në pikëpyetje nga proceset gjyqësore.