Presidentja e Kosovës, Justina Shiroka Pula, gjatë qëndrimit të saj në Hungari, ka zhvilluar një takim me bashkatdhetarët që jetojnë dhe punojnë atje, në një pritje të organizuar në Ambasadën e Kosovës në Budapest.
Në fjalën e saj, Shiroka Pula theksoi rëndësinë e kontributit të mërgatës në historinë e Kosovës, duke e vlerësuar rolin e saj në rezistencën paqësore, në radhët e Ushtrisë Çlirimtare të Kosovës dhe në procesin e ndërtimit të shtetit.
Ajo gjithashtu çmoi përkushtimin e komunitetit kosovar në Hungari, i cili, përmes punës, sipërmarrjes dhe sukseseve, ndihmon në zhvillimin ekonomik dhe forcimin e marrëdhënieve ndërmjet Kosovës dhe Hungarisë.
Presidentja veçoi praninë e rreth 300 studentëve nga Kosova në institucionet e arsimit të lartë në Hungari, duke shprehur shpresën se ata do ta përdorin dijen dhe përvojën e fituar për zhvillimin e vendit.
Gjatë takimit, Shiroka Pula u bëri thirrje bizneseve të mërgatës që të shqyrtojnë mundësitë për investime dhe partneritete afatgjata në Kosovë.
Ajo theksoi se vendi ka nevojë për përvojën, dijen dhe energjinë e bashkatdhetarëve të saj për të avancuar zhvillimin ekonomik.
Në përfundim, presidentja i falënderoi bashkatdhetarët për kontributin e tyre të vazhdueshëm për Kosovën, duke theksuar se dyert e atdheut mbeten të hapura për të gjithë ata që dëshirojnë të kontribuojnë në të ardhmen e vendit.
