Nga 62 lokomotivat e Hekurudhave të Republikës së Maqedonisë së Veriut (HRMV) Transport SHA Shkup, vetëm nëntë janë në funksion.
Sipas vlerësimeve, humbja për vitin 2024 arrin në 331.8 milionë denarë, duke e çuar në total humbjen e akumuluar nga vitet e kaluara në 6.75 miliardë denarë, sipas Entit Shtetëror të Auditimit (ESHA).
Sipas të dhënave nga ESHA, nga 62 lokomotivat, vetëm 9 janë funksionale.
Po ashtu, nga 16 grupe pasagjerësh, vetëm 5 janë në përdorim, ndërsa nga 47 vagonë pasagjerësh, vetëm 2 operojnë në trafik të rregullt për transportin e pasagjerëve.
Ka konstatuar edhe parregullsi në menaxhimin dhe evidentimin e një pjese të stoqeve të lëndëve të para, materialeve, pjesëve rezervë, inventarit të vogël, paketimit dhe gomave të makinave.
Rreth 71% e stoqeve, që përkthehet në 342.345 mijë denarë ose 5.548.000 euro, janë më të vjetra se viti 2019, duke sjellë në përfundim se në fund të periudhës kontabël nuk është bërë rregullimi i vlerës së tyre.
Në menaxhimin e derivateve të naftës, auditimi zbuloi gjithashtu trajtim të papërshtatshëm, joprofesional dhe të pasigurt gjatë pranimit dhe lëshimit të naftës, duke rrezikuar kështu sigurinë dhe shëndetin e qytetarëve, si dhe ambientin.
Pajisjet matëse janë të vjetra, të improvizuara dhe lehtësisht të manipulueshme, duke mos reflektuar gjendjen reale të derivateve të naftës në asnjë moment.
Po ashtu, mbushja e automjeteve me karburant realizohet me pompa, matësit e të cilave nuk janë verifikuar ose kalibruar për një periudhë të gjatë kohe.
