Kryeministri i Kosovës, Albin Kurti, ka njoftuar se shtesat për fëmijë do të rriten gradualisht në katër faza, me qëllimin që deri në janar të vitit 2030 të dyfishohen.
Gjatë mbledhjes së Qeverisë, Kurti theksoi se rritja e parë prej 25 për qind do të hyjë në fuqi më 1 janar 2027, ndërsa tri fazat e tjera do të realizohen në fillim të viteve 2028, 2029 dhe 2030.\n\nSipas shembullit të dhënë, aktualisht shtesa për një fëmijë është 30 euro në muaj.
Me rritjen prej 25 për qind, nga 1 janari 2027 ajo do të arrijë në 37.50 euro, që do të thotë një rritje prej 7.50 euro në muaj.
Kryeministri theksoi se kjo rritje është paraparë dhe buxhetuar në përputhje me angazhimin për dyfishimin e shtesave për fëmijë brenda mandatit qeverisës.\n\n“Pra, nga 1 janari 2027, shtesat për fëmijë rriten 25 për qind, pastaj edhe më 1 janar të vitit 2028 përsëri 25 për qind, në janar 2029 përsëri 25 për qind dhe në janar 2030 përfundon rritja graduale, duke rezultuar në dyfishimin e shtesave për fëmijë brenda mandatit,” tha Kurti.\n\nKryeministri ofroi edhe shembuj konkretë të përfitimeve për familjet pas rritjes së parë.
Një familje me dy fëmijë, që aktualisht merr 60 euro në muaj, nga janari i vitit 2027 do të përfitojë 75 euro, ndërsa një familje me katër fëmijë, që merr 180 euro, do të arrijë në 225 euro.\n\nKurti theksoi se rritja do të vazhdojë çdo vit, deri në dyfishimin e shumës aktuale të shtesave.
Në të njëjtën mbledhje, kryeministri diskutoi edhe mbi mbështetje financiare për katër ish-udhëheqësit e Ushtrisë Çlirimtare të Kosovës, të cilët po përballen me procesin gjyqësor në Hagë.
Ai njoftoi se është planifikuar një ndarje buxhetore, sipas kërkesës së paraqitur nga ekipet mbrojtëse.
